Read this page in:

Lagolagosua ma faamaoniga

E tatau ona moni folafolaga e faia e lau pisinisi e uiga i le faamanuiaina, ni tomai, i’uga o ni suesuega poo se fesoasoani o e mauaina, pe o loo maua e au tagata faigaluega, au oloa poo au auaunaga. O nei folafolaga e masani ona fai ina ia faatalitonu ai nisi e ono avea ma tagata faatau i le mea e ala ai ona sili atu le alu i le tasi pisinisi nai lo le isi ma avatu ai se faiga lelei faatauvā ae lē o fetaui pe afai e lē moni na folafolaga.

Folafolaga i tusipasi o agavaa ma tomai

E lē tatau ona e folafola atu ua uma ona lesitala oe e avea ma sui auai (membership) poo le faamaoniga a ni faalapotopotoga tau matata eseese se’i vaganā o lena lesitala ua mae’a ona faamaonia ma o loo fou.  E tatau foi ona mafai ona e faamaonia atu soo se folafolaga e te faia i ni ou tusipasi o agavaa poo tomai. E lē tatau ona faavae folafolaga i luga o ni talosaga, ni tusipasi o agavaa poo le lesitala e avea o se sui auai faavaitaimi, ae o loo faatalitali le faamautinoaina o na mea.

Faataitaiga: Sa taofia mo se taimi lē tumau mai le Registered Master Builders Federation, se kamupani faufale ona o se faaseā na fai i le leaga o le galuega na latou faia i se fale. E ui lava la i lenei taofiga lē tumau, ae na faaauau pea e lea kamupani ona latou faailoa atu le avea o i latou ma sui auai o le Registered Master Builders Federation ma sa maua foi e tagata na faaaogāina le latou auaunaga ni Master Build Guarantees, mo galuega sa latou faia. I nisi foi mea na tutupu, na talia ai e le kamupani ni tupe na totogi atu iai e tagata mo Master Build Guarantees ae latou te lei avatua talosaga a nei tagata faatasi ma tupe na latou totogia, i le vaega a le Master Build Services seia oo i le aso na amata ai loa ona faatino le galuega. O le i’uga, ina ua mulimuli ane faama’ape meatotino a lea pisinisi, e iai nisi tagata sa faaaogāina a latou auaunaga, e lei kavaina e se Master Build Guarantee. Sa faamaonia moliaga o faatonu o le kamupani, na faasala tupe ma poloaiina e totogi taui tupe mo ē ua afaina.

Folafolaga e uiga i faamanuiaga

E lē tatau ona e faia ni folafolaga taufaasese e uiga i ou lava faamanuiaga. Afai e fai se folafolaga e uiga i le faamanuiaina o se oloa patino, se auaunaga, poo se pisinisi, e tatau i lena folafolaga ona fou ma sa’o a’ia’i. Soo se folafolaga e te faia e uiga i se faamanuiaina na iai i taimi ua tea, e pei o se faailoga na manumalo ai i le lua tausaga ua tea, e tatau ona ta’ua manino ai le aso na maua ai lena faailoga. Mo se faataitaiga, afai e folafola mai e se fale’aiga e faapea o latou le ‘fale’aiga pito sili ona taugofie o le tausaga’, ae o lena faailoga na tauia ai na maua i le lima tausaga ua tea, ua solia la le Tulafono o Fefaatauaiga Talafeagai se’i vaganā ai na ta’ua manino le aso na maua ai lena faailoga.

Faataitaiga: Sa tufatufa e se tamaitai faatau fale ni laupepa na manatu ai tagata faapea o ia lea sa vaaia le faatauina o le fale. Ae o le mea moni, e lē o ia le tagata ofisa lea na faafoeina le faatauga o le fale, ma e lē o ia foi le mafuaaga na faataunuu ai le faatauga o le fale.  Na faamaonia faaletulafono moliaga o le tagata ofisa faatau fale ma lana kamupani faatau fale ma faasala tupe ai.

Lagolagosua ma faamaoniga

Ina ia faalauiloa le tāua o se oloa poo se auaunaga, e ono manaomia e lau pisinisi se faamaoniga mai se tagata iloga poo se faalapotopotoga iloga. E tatau ona moni soo se fesoasoani e folafola mai, ma e tatau ona malie le tagata poo le faalapotopotoga e mafai e lau pisinisi ona fai mai lena folafolaga.

E solitulafono le faia o ni folafolaga sese pe taufaasese e faapea, o loo fesoasoani mai se tagata poo se faalapotopotoga i se oloa poo se auaunaga ae lē sa’o. O faamaoniga faapena e aofia ai se tusi faamaonia o le saogalemu o le oloa i le itu faafoma’i. E lē tatau foi i pisinisi ona latou folafola mai se faamaoniga a se faalapotopotoga e lē moni pe ua uma ona faata’ape.

E faatoa tatau lava ona e faia se folafolaga e faapea o loo faaaogā e se tasi se oloa patino pe afai e moni o loo faia lea tulaga. Soo se folafolaga e faia e se tagata o loo ia faamaoniaina le oloa poo le auaunaga e tatau ona moni ma o se mea e fou nei.

Faataitaiga: Sa sapalai fua atu e se pisinisi ni api a’oga i a’oga, ae toe faaola a latou tau mai faasalalauga faalauiloa sa faia i luga o api. Sa folafola pepelo e se tagata faigaluega o ia o le taitaifono o le komiti a le latou aoga a’o ia feiloai atu i ni kamupani e ono fai ni a latou faasalalauga faalauiloa. Sa folafola pepelo foi e le pisinisi e faapea ua faamaonia mai e nisi o matagaluega e lua a le malo i le latou polokalame. Sa faamaonia faaletulafono moliaga o le pisinisi ma faasala tupe.

E lē fesoasoani pe faamaonia e le Komisi o Fefaatauaiga se faalapotopotoga, se tagata, polokalame poo se vaega tau maketi, ma o le faia o lenei folafolaga o le a solia ai le Tulafono o Fefaatauaiga Talafeagai.

Suesuega ma sailiiliga

O i’uga o suesuega poo sailiiliga e fetaui ma se oloa poo se auaunaga e ono mafai ona ta’ua i se faasilasilaga faalauiloa. Afai e faia lea tulaga, e lē tatau la ona faaseseina i’uga ina ia foliga mai ai ua matuā fetaui lelei. E tatau i pisinisi ona latou saunia ni faamaoniga e faavae ai le sa’o a’ia’i ma le tāua o i’uga, pe afai e fesiligia i latou.

O le faia o ni faamatalaga e faasino atu i se suesuega poo se sailiiliga e lei faatinoina, o le a solia ai foi le Tulafono o Fefaatauaiga Talafeagai. E tāua foi mo soo se faamatalaga e faia, ia aua ne’i taitaiseseina ai tagata faatau e tusa ai o le uiga tonu, le umi poo le tulaga o soo se suesuega poo se sailiiliga e faia.

Faalauiloaina i ata

O le faalauiloaina i ata (image advertising) e fai pe a taumafai se pisinisi e fafau a’e se ata manaia o le pisinisi poo ana oloa poo auaunaga i mafaufau o tagata.

Mo se faataitaiga, atonu e taumafai se pisinisi e faaoo mai se ata e faapea e latou te faatāua tele le siosiomaga e ala i le faaaogā mai o ni vaaiga i laufanua i se faasilasilaga faalauiloa, poo ni mamanu o loo iai ata o mumua (dolphins) poo laau. A lē o lena, e te ono faaaogāina se tagata lauiloa, faatasi ma ni sootaga talafeagai, e unai ai le moomia o se oloa ma faamalosia atili ai lona ata poo lona tāua.

Afai o se faaataga lea mea lea ua fai, atonu la ua solia le Tulafono o Fefaatauaiga Talafeagai pe afai e maua ane, ua fafau mai se mea e lē o mafai ona faamaonia le moni. E faapena foi i faasilasilaga faalauiloa e lē tatau ona fafau a’e ai se ata o lau oloa poo lau auaunaga lea e lē mafai ona lagolagoina e ni mea moni.

Gugutu

E lē o faasāina mai e le tulafono le ‘gugutu’ – le soona faatelē naua o se mea o loo manino mai lava e lē ina ia faaseseina ai se tasi. Peitai ane, e tatau pea ona e faaeteete ia aua ne’i e faia ni folafolaga e foliga mai e mo’i, ae o le mea moni lava e lē mo’i. Faitau atili i faaupuga loloto e faigata ona malamalama ai (Jargon), soona faatelē naua o se mea ma le gugutu.