Read this page in:

Ko e ‘ū tokoni (sponsorships) mo e poupou pe fakamo‘oni (endorsements)

Ko e ngaahi taukave ‘e ho‘o pisinisí fekau‘aki mo e ngaahi lavame‘a, poto‘i ngāue, ngaahi taukei, pe poupou ‘oku ke ma‘u, pe ko ia ‘oku ma‘u ‘e ho‘o kau ngāué, koloa pe ko ha ngāue ‘oku nau fai, kuopau ke mo‘oni kotoa. Ko e ngaahi taukave ko ení ‘oku fa‘a ngāue‘aki ia ke tohoaki‘aki e kakai fakataú ki ha pisinisi ‘e taha ka nau sītu‘a mei he taha ‘o ala hoko ai ‘a hono ma‘u ha faingamālie ‘oku makatu‘unga he fakamatala ‘oku ‘ikai mo‘oni pe hala.

Ko e ngaahi taukave ‘o e faka‘ilonga ako pe ‘ilo (qualifications) pea mo e poto‘i ngāue (skills)

‘Oku ‘ikai totonu ia ke ke fakahā ‘oku ke mēmipa pe kuo tali ‘e ha sino pe kautaha ‘oku nau ‘i he mala‘e fefakatau‘aki tatau mo koe, kae‘oua kuo tali ‘a ho‘o kole mēmipá pea ‘oku kei ngofua mo ‘atā ke ngāue‘aki. Kuopau ke ke lava ‘o fakamo‘oni‘i ko e ngaahi faka‘ilonga ako pe ‘ilo pe poto‘i ngāue na‘a ke taukave‘í ‘oku mo‘oni. Ko e ngaahi taukave kotoa pe te ke fakahoko, ke ‘oua na‘a fakatefito ‘i ha ‘ū tohi kole ‘oku kei fakatatali ki ai, pe ha ngaahi tohi fakamo‘oni (certifications) pe mēmipa ‘oku kei fai ha tatali ki ai pe ‘oku te‘eki ai ke kakato.

Hangē ko eni: Na‘e tuku ki tu‘a ha kautaha langa na‘e mēmipa he kulupu Registered Master Builders Federation, tupu mei ha lāunga na‘e fakahoko fekau‘aki mo e tu‘unga ‘o e ngāue ne nau fai ‘i ha ‘api. Neongo hono tuku e kautahá ni ki tu‘á, ne nau kei hokohoko ngāue pe ki nautolu mo tala ‘oku nau kei mēmipa he kulupu Registered Master Builders Federation pea ‘e kei ma‘u ‘e he kakaí ‘a e malu‘i Master Build Guarantees ki he ngāue na‘a nau fakahokó. ‘I he taimi ni‘ihi, ne tali pē ‘e he kautaha langá ia ‘a e ‘ū totongi ki he malu‘i Master Build Guarantees ka ne ‘ikai ke nau fakahū ‘a e ‘ū tohi kolé mo e totongí ko iá ki he Master Build Services kae ‘oua leva kuo kamata ‘e nau ngāue ‘i he feitu‘u ne fai ai e langá. Ko hono pango, ko e taimi ne holofa ai e kautaha langá ni, ne ‘i ai e kakai ia ne ‘ikai malu‘i ki nautolu ‘e ha Master Build Guarantee ‘o nau ‘efihia ai. Na‘e mo‘ua ‘o tautea totongi pa‘anga e kau talēkita ‘o e kautahá pea fekau ke nau totongi fakafoki e pa‘anga ‘a e kakaí.

Ko e taukave‘i ha ngaahi lavame‘a

Kuopau ke ‘oua na‘a ke taukave‘i 'o takihala‘i ha‘o ngaahi lavame‘a. Kapau ko ha tu‘uakí pe taukave‘i ‘oku felāve‘i mo ha lavame‘a ‘o ha koloa, ngāue, pe pisinisi, pea kuopau ke tonu pea kei ngofua mo ‘aonga ke ngāue‘aki (current). Ko e ngaahi tu‘uaki ‘oku ke fai fekau‘aki mo ha ngāue ne ola lelei he kuohilí, hangē ko ha ma‘u pale ne hoko he ta‘u ‘e 2 kuo toki maliu atú, kuopau ke fakahā mahino ‘a e ‘aho ne foaki ai. Fakatātā ‘aki eni, ko ha falekai ‘oku nau fakahā ne nau ma‘u ‘a e pale ki he ‘falekai lelei taha ‘o e ta‘u‘, ne foaki ki a ki nautolu he ta‘u ‘e 5 kuohilí, te nau maumau‘i e lao Fair Trading Act kae ‘oua leva kuo nau fakahā mahino e ‘aho ne foaki ai e palé.

Fakatātā: Ko ha fakafofonga mei ha kautaha fakatau fale ‘oku ne tufa holo e pepa tu‘uaki ‘oku ‘asi ai ne ‘osi ‘i ai e fale na‘a ne fakatau atu. Ka ko hono mo‘oní, ne ‘ikai ko ia ‘a e fakafofonga na‘a ne fakatau atu e fale pea ‘ikai foki ha‘a ne felāve‘i ‘a‘ana ‘e taha ki ai. Na‘e mo‘ua ‘o tautea totongi pa‘anga fakatoulōua ‘a e fakafofongá mo e kautahá.

Ko e ‘ū tokoni (sponsorships) mo e Poupou (endorsements) fakapa‘anga

‘E ala ngāue‘aki ‘e ho‘o pisinisí ha fakamo‘oni pe poupou mei ha tokotaha pe kautaha ‘iloa ke tu‘uaki atu ‘aki ha koloa pe ko ha ngāue ke fai tu‘uaki atu ha koloa pe ngāue ‘oku malava ke ke kole ha poupou fakapa‘anga mei ha taha pe kautaha ‘iloa ke fai‘aki e tu‘uakí. Ko e ngaahi poupou pehē ni kuo pau ke tonu mo mo‘oni pea ke loto mo tali ‘e he tokotaha pe kautaha ‘oku ne fai ‘a e poupou ke fai ia.

‘Oku ta‘efakalao ke tala na‘e poupou‘i ‘e ha taha pe kautaha ha koloa pe ngāue ka na‘e ‘ikai hoko ha me‘a pehē. Hangē ko hano tu‘uaki ha koloa fakafaito‘o pe fakamo‘oni‘i ‘a e tu‘unga malu (safety) ‘o e koloá ‘i hono ngāue‘akí. ‘E ‘ikai ngofua ki he ngaahi pisinisí ke nau taukave‘i ha tokoni poupou mei ha kautaha ‘oku loi/fa‘ufa‘u pe kuo ‘osi movete.

‘Oku toki ngofua ke taukave‘i ‘oku ‘i ai e tokotaha ‘oku ne ngāue‘aki ha koloa ‘i ha‘o fakapapau‘i ‘oku nau ngāue‘aki ia. Ko ia ko ē ‘oku ne ngāue‘aki e koloá pe nāunaú ke ne tala e mo‘oni pea ‘oku ne lolotonga fai pehē.

Fakatātā: Ko ha pisinisi na‘a nau tufa ha naunau ako ta‘etotongi ki ha ‘ū ‘apiako, ka nau tānaki e fakamole ko iá mei he tu‘uaki ‘oku ‘asi he takafi ‘o e naunaú. Loi e tokotaha ngāue ‘a e kautahá ‘o ne fakahā ko e sea ia ‘i he komiti fakahoko fatongia ‘a e ‘apiakó ‘o fai‘aki ‘ene kole ki he kau tu‘uakí. Toe loi e pisinisi ‘o tala ne ‘osi poupou‘i e founga ngāue ni ‘e ha ongo potungāue fakapule‘anga. Na‘e tautea ‘a e pisnisí pea mo‘ua pa‘anga.

‘Oku ‘ikai ‘oange ‘e he potungāue Commerce Commission ha ngofua ki ha fa‘ahinga kautaha, tokotaha pe founga fakamāketi, pea ka hoko ha taukave pehē ni, ko e maumau‘i ia ‘a e lao Fair Trading Act.

Ngaahi sivi mo e savea

Ko ha ola ‘o ha sivi pe savea ‘oku kaunga lelei ki ha koloa pe ngāue ‘i hano tu‘uaki atu, ‘e fiema‘u ia ke fakahā ke mahino. Ka hoko eni, ‘e ‘ikai ngofua ke toe mio‘i e olá ke hā ngali lelei mo manakoa ai e koloá. Kuopau ke tukuange ke lava ‘e he ngaahi pisinisi ‘o fakamo‘oni‘i ‘oku tonu mo mo‘oni pea ‘oku fenāpasi lelei ia, ‘okapau ‘e fakafehu‘ia.

Ko hono fakakau mai ‘o ha sivi pe savea na‘e ‘ikai ke fai, ko hono maumau‘i ia ‘o e lao Fair Trading Act. ‘Oku mahu‘inga foki ke ‘oua ‘e takihala‘i e kakai fakatau koloá ‘aki ha ngaahi fakamatala ‘oku kehe ia mei he natula, lahi mo e mo‘oni ‘o ha sivi pe savea ‘oku fai.

Tu‘uaki ‘īmisi

Ko e tu‘uaki ‘īmisí ko e founga ‘oku ngāue‘aki ‘e ha pisinisi ke fa‘u ha fakatātā pe ‘ata ke ngali lelei ‘i he ‘atamai ‘o e kakai fakataú ‘a e kautahá pe ko ‘enau koloa pea pehē foki mo ha‘a naunau pe ngāue.

Hangē ko ha feinga ‘a ha pisinisi ke ‘asi ki tu‘a ‘oku nau tokangaekina e ‘ātakai pea nau ngāue‘aki ha ngaahi ‘ata ‘i he ‘enau tu‘uakí ‘oku hā ai e ika ko e pele (dolphins) pe ko ha ‘ulu‘akau kehekehe. Pe ko ho‘o ngāue‘aki ha taha ‘iloa mo e mala‘e ‘oku ‘iloa aí, ke tu‘uaki‘aki ha koloa pea toe mata‘ā‘ā ange ai hono ‘imisí.

Ka ‘i ai ha tu‘uaki pehē kuo ‘osi fakahoko pea toki fakatokanga‘i kimui ne ‘ikai lava ke fakamo‘oni‘i, ‘e malava ke uesia ai e lao Fair Trading Act. Ko e me‘a tatau pe kapau ‘e fai ha tu‘uaki ke ha ngali lelei ‘a ho‘o koloa pe ngāue ‘o ‘ikai lava ke ma‘u ha fakamo‘oni ki ai.

‘Afa‘i

‘Oku ‘ikai ke ta‘ofi ‘e he laó ia ‘a e “‘afa‘i” – pe ko hono fakalahi‘i ha tu‘uaki ha koloa ‘o fu‘u tōtu‘a ‘o ‘ikai ke kei lava ‘o takihala‘i ‘e ia ha taha. Neongo ia, kuopau ke ke matu‘aki tokanga ke ‘oua te ke fakahā pe fai ha taukave‘i ha me‘a ‘oku ngali mo‘oni kae hili ange ko ia ‘oku ‘ikai ke mo‘oni. Lau ha toe fakamatala lahi ange ki he ngaahi lea fakatenetene, fakalahi mo e ‘afa‘i.