Read this page in:

Afai o loo e fealuai e faatau atu au oloa, e tatau ona iai sau polokalame faataatia e te tausisi iai mo le faamautinoaina o oe, ma soo se tagata e te faafaigaluegaina, o loo faia le tou matafaioi e tusa ai ma le tulafono pe a faatauina atu oloa.


Fautuaga mo le tausisi i faiga faapisinisi

  • O le a iai le aiātatau a lau tagata faatau e toe solofua ai – ia faamautinoa ua e malamalama i ou tiute fai ma a latou aiātatau.
  • E tatau ona faamatala i se gagana faigofie le konekarate a lau tagata faatau ma i se auala manino ma puupuu.
  • Afai e te ofo e kiliva atu e oe oloa, e tatau lava la ona kiliva i totonu o le taimi faatulagaina.
  • Saili ni fautuaga tutoatasi mai se loia ina ia faamautinoa ai o loo e faatinoina ou tiute fai.

O loo maua le vitiō ua iai ma ona faamatalaga faa-Samoa (subtitles).

Filifili le faailoga (icon) o le Settings i le tulimanu taumatau i le pito i lalo o le masini vitiō > Oomi le upu Subtitles/CC > Filifili le gagana e te manao ai.

Le tulafono

O a ituaiga tulafono e faatatau i lau pisinisi o le a faalagolago lea i le faiga e faatau atu ai au oloa, le faagasologa o le pisinisi, ma ituaiga o konekarate o loo e faaaogāina mo au tagata faatau. E pa’ū ia te oe ina ia e malamalama i tulafono e tatau ona e tausisi iai ma saili fautuaga faaletulafono e uiga i mea e ao ona tausisia e lau pisinisi. O loo ta’ua i lalo nisi o faata’ita’iga o tulafono e ono fetaui ia te oe.

Faitau atili e uiga i tulafono o loo matou faamalosia.


Tulafono mo Konekarate o Faatauga Faaaitalafu ma le Tupe a le Tagata Faatau (Credit Contracts and Consumer Finance Act - CCCF Act)

Ua faatulaga atu e le CCCF Act tulafono e faatatau i le faailoaina o faamaumauga, o tupe tului (interest) ma tau e totogi (fees) e apalai i konekarate faaaitalafu a le tagata faatau. E tatau foi i kamupani nonō tupe (lenders) ona usitaia taiala o o latou tiute tauave pe a ofoina faaaitalafu ni oloa.

Tagai poo afea e apalai ai le tulafono faaaitalafu a tagata faatau i lau pisinisi.


Faatauga e faasolo i fale o aiga ma faia i luga o telefoni (poo faatauga tuusa’o faatauanau)

O maliega nei mo le faatauina o oloa poo auaunaga e sili atu i le $100 le tau o loo fetuutuuna’i i le fale o le tagata faatau, poo le fale faigaluega, poo luga o le telefoni ae e lei valaaulia e le tagata faatau le tagata e ana oloa i lona fale, pe e lei fai foi iai e vili atu latou e faatau atu ai ana oloa poo ana auaunaga. O konekarate e mafua mai faatauga e faasolo i fale o aiga ma faatauga e fai i luga o le telefoni ua ono fetaui foi i totonu o le vaega lea.

E tatau ona e faailoa faamatalaga faapitoa e uiga i le maliega ma ia tausisi i tulafono e faatatau i le solofuaina o se maliega, ma le auala e faamalosia ai se maliega ua faia.

Faitau atili.


Faatauga e togitogi muamua

Pe a e ofoina atu oloa i au tagata faatau i le faiga e togitogi muamua se’i mae’a le tau faato’ā ave ai le oloa (layby), e tatau foi ona e tausisi i tulafono e pei o le faamautinoaina o loo tusia i le gagana faigofie le maliega, ma e avatu i le tagata faatau sana kopi i le taimi lava e uma ai ona faia.

E tatau foi ona iai faamaumauga faapitoa i totonu o le maliega o lau layby.

Faitau atili e uiga i faatauga e faaaogā ai le layby.


Tuutuuga lē talafeagai o se konekarate

Afai e itiiti pe leai se avanoa e mafai ai e lau tagata faatau ona fetuutuuna’i tuutuuga o le konekarate ma oe, o lona uiga e foliga mai o se konekarate masani lava lea mo tagata faatau (standard form consumer contract). Mo se faataitaiga, e te ono ofoina atu se konekarate masani mo le tagata faatau e faavae i le faiga e ‘ave pe tuu’ (take it or leave it). E ono tutusa foi, pe talitutusa atu foi, i konekarate o loo e ofoina atu i isi au tagata faatau.

Afai e te faaaogāina konekarate masani e avatu ai oloa poo auaunaga ia e masani ona faaaogā mo fuafuaga a le tagata lava ia poo lona aiga, e lē mafai la ona e faaofiina ai ni tuutuuga e lē talafeagai.

Faitau atili.


Lipoti o le polokeki a le tagata o loo fealuai e faatau atu oloa

Le lipoti a le Komisi 2014/2015 mo le Polokeki a le Tagata o loo Fealuai e Faatau atu Oloa (Mobile Trader Project).