Read this page in:

Ki te haere hāngai atu koe ki ngā kiritaki i ō rātau kāinga, mā te waea rānei hei hoko atu i ō rawa, tērā pea he whakaaetanga hoko hāngai urutomo pea te hokonga, ā, kei reira ngā herenga me ū koe.

E hāngai ana ngā ture ki ngā māngai ka tonoa e koe, ngā māngai hokohoko rānei e mahi ana māu e hokohoko pēnei ana. Kei a koe te kawenga ki te whakarite e mōhio ana rātau ki ngā ture me te ū ki aua ture.

E kapi ana i ngā ture mō ngā whakaaetanga hokonga hāngai urutomo ngā mea me whakamōhio atu koe ki ngā kiritaki ina whakariterite ana koe i te hokonga, ngā mōhiohio hei whāki, ā, me pēhea. He ture anō e tohutohu ana me pēhea, āhea hoki ka āhei te kiritaki ki te whakakore i te whakaaetanga, ā, me te wā ka āhei koe ki te whakaū.


He aha te hokonga hāngai urutomo?

Ko te hokonga hāngai urutomo he hokonga ka oti mēnā:

  • ka urutomo tō haere ki tētahi kiritaki i tōna kāinga, wāhi mahi, mā te waea rānei ka whakariterite ki te hoko rawa, ratonga rānei ki a ia; ā,
  • he $100, neke atu rānei te utu o ngā rawa, ratonga rānei (kāore rānei i te mōhiotia te utu i te wā i whakaratoa).

He hokonga hāngai urutomo pea te hokonga ahakoa pea ka:

  • tukuna e tētahi kiritaki ana taipitopito whakapā ki a koe mō te kaupapa kotahi (pērā i te uru ki tētahi whakataetae), ā, ka whakapā atu koe ki a ia hei hoko atu i ētahi rawa, ratonga rānei;
  • whakautu he kiritaki i te mea i ngana koe ki te whakapā atu engari kīhai i taea (pērā i te whakahoki i tētahi waea tāhapa, te whakautu ki tētahi kāri pakihi);
  • uru he kiritaki ki ngā whakariterite me koe i muri i te whiwhi i tētahi whakatau utu tonokore, whakatau tata tonokore rānei.

Ka taea e koe te pānui anō i roto i ā mātau tohutohu Te whakamahi māngai me ngā kaihoko waea.


Ngā ture mō ngā hokonga hāngai urutomo

Me mātua tuku mōhiohio koe ki ngā kiritaki ina whakariterite ana koe i tetahi hokonga hāngai urutomo.

Ina whakariterite ana koe i tētahi hokonga ko tāu, tā tō māngai rānei me mātua:

  • whakamōhio atu ki te kiritaki mō tana motika ki te whakakore i te whakaaetanga i roto i ngā rā mahi e 5, ā, me pēhea te whakatutuki i taua motika - me mātua tutuki tēnei i mua i te urunga a te kiritaki ki te whakaaetanga
  • tuku ki te kiritaki tētahi tārua ā-tuhi o te whakaaetanga ina whakauru atu. Mēnā ka oti te whakaaetanga mā te waea me mātua whiwhi te kiritaki i tētahi tārua ā-tuhi o te whakaaetanga i roto i ngā rā mahi e rima.

Me mātua mārama te whakaaetanga me te whai mōhiohio tauwhāiti.

Ko ngā whakaaetanga hokonga hāngai urutomo me mātua:

  • tuhi
  • whakapuaki ki te reo mārama kia tino mārama ai
  • mārama te tuhi me te whakaatu.

Me mātua uru ki te whārangi o mua ko:

  • tētahi whakaahuatanga mārama o ngā rawa, ratonga rānei e whakaratoa ana
  • tētahi whakarāpopotonga o ngā motika o ngā kiritaki hei whakakore i te whakaaetanga
  • te ingoa o te kaiwhakarato, wāhi mahi, tau waea, wāhitau īmēra hoki
  • te ingoa o te kiritaki me te wāhi noho.

Me mātua kī anō te whakaaetanga i:

  • te rā
  • te utu tapeke hei utu i raro i te whakaaetanga.

He motika tō ngā kiritaki ki te whakakore

Ka āhei te kiritaki ki te whakakore i tētahi whakaaetanga hokonga hāngai urutomo i roto i ngā rā mahi e rima o te whiwhi i te whakaaetanga. Ka taea pea e ia te whakakore ahakoa te wā ki te kore koe e tukuna e koe ngā mōhiohio kua rārangitia i runga ake.

Ki te whakakorehia te kirimana e te kiritaki, ko tāu me mātua:

  • whakahoki wawe i ngā moni katoa i utua e te kiritaki i raro i te whakaaetanga;
  • whakarite kia kohia (pātai rānei ki te kiritaki kia whakahokia) ngā rawa kua whakaratoa e koe, ā, māu e utu;
  • mēnā kua rerekē ngā ratonga, kua tūkinohia rānei te rawa a te kiritaki me mātua whakahoki e koe te rawa a te kiritaki ki tōna āhua i mua mēnā koinā te tono ki a koe. Kāore koe e āhei atu ki ngā paremata mō ngā ratonga kua whakaratoa kētia i raro i te whakaaetanga.

He herenga anō ō ngā kiritaki ina whakakore ana i ngā whakaaetanga hokonga hāngai urutomo pērā i te manaaki tika i ngā rawa kua whakaratoa kētia e koe me te whakaae atu kia kohia e te kaiwhakarato ēnei rawa. Pānui haere anō i roto ā mātau tohutohu mō ngā hokonga hāngai urutomo.


Te wā e āhei koe ki te whakaū i tētahi whakaaetanga hokonga hāngai urutomo

Kāore e taea e koe tētahi whakaaetanga hokonga hāngai urutomo te whakaū kia pau rā anō te wā whakakorenga. Arā, tē taea e koe te whakahau kia tuku utunga te kiritaki kia hipa rā anō te wā whakakorenga o te rima rā.

I muri i taua wā, ka taea anake tētahi whakaaetanga te whakaū mēnā kei roto ngā mōhiohio e tika ana, ā, kua tukuna e koe ki te kiritaki. Hei tauira, kāore e taea te whakaū tētahi whakaaetanga kāore i tuhia te rā, kāore i tuhia ki te reo mārama me te āta tuhituhi kia mārama te takoto o te kōrero.

Mēnā kāore te whakaaetanga i te mārama, kāore i te whai mōhiohio tika rānei engari he iti noa te raru, ā, kāore e whakararuraru i te kiritaki (pērā i te kotahi rā te tōmuri ki te tuku i tētahi tārua ā-tuhi) ka taea tonu pea te whakaaetanga te whakaū. Engari, e tūtohu ana mātou kia tino ū tonu ngā pakihi katoa ki ngā whakaritenga whakapuakanga mōhiohio kia kore ai e rangirua.

Tauira

Ka waea atu tētahi kaihoko waea ki a Daniel ki te tuku i tētahi whakahekenga utu ki te whakawhiti ratonga whakarato hiko ki tētahi atu kaiwhakarato mō te 12 marama te roa. Kāore i tika te tuhi a te kaihoko waea i ngā taipitopito wāhi noho a Daniel. Nā tēnei, kāore a Daniel i whiwhi i tētahi tārua o te whakaaetanga ā-tuhi i roto i te rima rā. Nāwai rā ka tae atu he tārua o te whakaaetanga ki a Daniel i te toru wiki i muri mai engari kua whakatau kē ia kia noho tonu ki tāna ake kaiwhakarato onāianei. Kāore i tukuna e te kaiwhakarato he tārua o te whakaaetanga ki a Daniel i roto i te wā tika nō reira kāore i ū ki ngā whakaritenga whakapuakanga mōhiohio. Kāore e taea te whakaaetanga te whakaū, ā, kei a Daniel te tikanga ki te whakakore ahakoa te wā.


Ka hāngai ēnei ture ki te whakaaetanga whakahou?

Kāo. Ki te whai whakaaetanga tētahi pakihi onāianei me tētahi kiritaki ka whakahoutia mā te whakapā atu urutomo (hei tauira, ina waea atu he kaihoko waea ki te kōrero ki te whakaroa atu i tana mahere onāianei), ehara i te mea he whakaaetanga hokonga hāngai urutomo tēnei i raro i te Fair Trading Act. Ka kīia he whakaaetanga whakahou ēnei.

Pānui haere anō i roto i ā mātau tohutohu mō ngā hokonga hāngai urutomo.


Ngā āwhina mā ngā pakihi

Hei whakarite kei te whai ngā kaimahi hokohoko me ngā māngai hokohoko i ngā ture ko te tūtohu ki a koe:

  • kia whakatinanahia he kaupapa whakangungu matawhānui kia mārama ai ngā kaimahi me ngā māngai, ā, ka kawe rātau i ō rātau herenga ā-ture
  • kia aroturuki i ngā whakatutukitanga a ngā kaimahi kia mātua whakarite kei te ū rātau ki te ture me te tautohu i ngā raruraru
  • me tirotiro i ō whakaaetanga hokohoko hei whakarite kei roto katoa ngā mōhiohio katoa e hiahiatia ana e te ture.