Read this page in:

Afai e te feiloai sa’o atu i tagata faatau i o latou fale pe e te telefoni atu e faatau iai au oloa, atonu o lena faatauga o se maliega mo faatauga tuusa’o faatauanau, ma e iai matafaioi e manaomia ona e usitaia.

O tulafono foi na e faatatau atu foi i soo se vaega lava o loo e faaaogāina poo ni tagata faatau oloa o loo e faafaigaluegaina e faatauina atu au oloa i lenei auala. O le tiute tauave a oe le faamautinoa ua latou malamalama i tulafono ma tausisi iai.

O tulafono e uiga i maliega mo faatauga tuusa’o faatauanau, o loo aofia ai mea e tatau ona e ta’u atu i tagata faatau a’o outou fetuutuuna’i i le faiga o se faatauga, o ā faamatalaga e tatau ona e faailoa atu ma le auala e te faailoa atu ai. E iai foi tulafono i le pe faapefea ma o afea e mafai ai e le tagata faatau ona toe solofua le maliega ma le taimi e mafai ai ona e faamautuina lena maliega.


O le ā le faatauga tuusa’o faatauanau?

O se faatauga tuusa’o faatauanau o se faatauga lea ua fai pe afai:

  • ua e feiloai atu i se tagata faatau i lona fale ae na te lei valaauliaina oe, pe i lona fale faigaluega pe e te telefoni atu foi iai, ma e faia ni fetuutuuna’iga e faatau atu iai au oloa poo auaunaga; ma
  • o oloa poo auaunaga e tusa le tau ma le $100 pe sili atu (pe e lē o mautinoa pe fia le tau i le taimi e avatu ai).

E mafai ona avea lena faatau o se faatauga tuusa’o faatauanau, e tusa lava pe:

  • tuuina atu e le tagata faatau ona faamaumauga mo le mafuaaga e tasi (e pei o le faaulu o lona suafa mo se tauvaga) ae ua avea lea ma mea ua e faafesoota’ia ai o ia ina ia faatau atu iai isi au oloa poo auaunaga;
  • tali mai le tagata faatau i sau taumafaiga sa lei taulau e faafesootai ai o ia (e pei o le toe vili mai o se tasi na misia lana vili atu poo le vili mai i se numera na tusi atu i se card e vili mai ai);
  • ua fai se lua fetuutuuna’iga ma le tagata faatau ina ua latou maua fua mai ia te oe se tau poo se fua faatatau o le tau o se mea.

E mafai ona e faitau atili i la matou taiala o le Faaaogāina o ‘agents’ (tagata/ofisa sooupu) ma ‘telemarketers’ (tagata e faatauina atu mea i luga o telefoni).


Taiala mo faatauga tuusa’o faatauanau

E tatau ona e tuuina atu i tagata faatau faamatalaga pe a fai se tou fetuutuuna’iga mo se faatauga tuusa’o faatauanau.

Pe a faia fetuutuuna’iga o se faatauga, e tatau ia te oe poo lē o loo fai ma ou sui e faatauina atu au oloa ona:

  • ta’u i le tagata faatau e iai lana aiātatau e toe solofua ai le maliega i totonu o le 5 aso faigaluega, ma le auala e faatino ai lena aiātatau – e tatau ona fai lenei mea a’o lei ioeina e le tagata faatau lena maliega
  • avatu i le tagata faatau se kopi tusitusia o le maliega pe a uma ona ioeina. Afai o luga o le telefoni na fai ai le maliega, e tatau i le tagata faatau ona maua sana kopi tusitusia o le maliega i totonu o le lima aso faigaluega.

E tatau ona manino le maliega ma ia aofia ai faamatalaga ma’oti.

Soo se maliega mo faatauga tuusa’o faatauanau e tatau ona:

  • tusitusia
  • faailoa i se gagana manino ina ia faigofie ona malamalama ai
  • mafai ona faitau ma manino lelei le tuuina mai.

O le itulau pito i luma o le maliega e tatau ona aofia ai:

  • se faamatalaga manino o oloa poo auaunaga ua saunia e tuuina atu
  • se aotelega o le aiātatau a le tagata faatau e toe solofua ai le maliega
  • le igoa o le tagata/kamupani o loo sapalai maia le oloa poo le auaunaga, le tuatusi o le auala e iai, numera o le telefoni ma le tuatusi o le imeli
  • le igoa o le tagata faatau ma le tuatusi o le auala e nofo ai.

E tatau foi i le maliega ona ta’ua manino ai:

  • le aso
  • le tau atoa e ao ona totogia e tusa ai o le maliega.

E iai le aiātatau a tagata faatau e solofua ai

E mafai e se tagata faatau ona solofua se maliega mo faatauga tuusa’o faatauanau, i totonu o le lima aso faigaluega talu ona maua atu le maliega. E ono mafai ona latou solofuaina i soo se taimi pe afai e te lē avatua faamatalaga na o loo ta’ua i luga.

Afai e solofua e le tagata faatau le maliega, e tatau ona e:

  • vave ona toe totogi atu tupe uma na totogi mai e le tagata faatau e tusa ai o le maliega;
  • faatulaga e toe ao mai (pe fesili i le tagata faatau e toe faafoi mai) soo se oloa ua uma ona e totogia le auina atu;
  • afai o le auaunaga lea ua uma ona faatino ua faaletonu pe ua leaga ai le meatotino a le tagata faatau, e tatau ona e toe faafoi le meatotino a le tagata faatau i le tulaga lelei na muai iai pe afai e tāpā mai oe ina ia faia faapea. E te lē agavaa mo se taui tupe e totogi atu mo ni auaunaga ua uma ona faatino i lalo o le maliega.

E iai foi matafaioi a tagata faatau pe a solofua ni maliega mo faatauga tuusa’o faatauanau, e pei o le tausi faalelei o soo se oloa ua uma ona tuuina atu ma faataga i latou na faaooina atu oloa e o atu e toe ao mai. Faitau atili i la matou taiala e uiga i faatauga tuusa’o faatauanau.


O le taimi e mafai ai ona e faamalosia se maliega mo faatauga tuusa’o faatauanau

E lē mafai ona e faaaogāina se maliega mo faatauga tuusa’o faatauanau se’iloga ua uma le vaitaimi lea e mafai ai ona toe solofua (cancellation period). I nisi faaupuga, e lē mafai ona e tauanauina le tagata faatau e fai mai ni peimeni se’iloga ua tea aso e lima lea e mafai ai ona toe solofua.

A uma loa lena taimi, e faatoa mafai loa ona faaaogā se maliega pe afai ua iai uma i totonu faamatalaga ua talafeagai ai ona fai ma ua uma ona e tuuina atu nei faamatalaga i le tagata faatau. Mo se faataitaiga, atonu e lē mafai ona faaaogā se maliega pe afai e leai se aso o tusia na fai ai, ma e lē o tusia foi i se gagana manino ma i se faatulagana faigofie ma talafeagai ona tusia ai.

Afai e lē o manino le maliega pe lē o sa’o fo’i faamatalaga o loo tuuina atu ai, ae lē o se mataupu telē ma e lē o afaina ai le tagata faatau (e pei o le tasi se aso ua tuai ai ona e tuuina atu se kopi tusitusia o le maliega) e ono mafai lava la ona faaaogā le maliega. Ae peitai, matou te fautua atu e tatau i pisinisi uma ona usitaia atoatoa le tulaga o faamatalaga e tuuina atu ina ia alofia ai lagona lē mautinoa.

Faataitaiga

Ua vili atu ia Tanielu, se tagata o loo faatauina atu auaunaga i luga o telefoni (telemarketer), ma ofo atu se tau faapitoa e na te totogia e suia ai lana eletise mai le kamupani eletise o loo iai i le taimi nei i le isi kamupani eletise mo le umi e 12 masina. E lei sa’o lelei ona faamau i lalo e le tagata o loo faatauina atu auaunaga i luga o le telefoni, le tuatusi o Tanielu. O le iuga, e lei maua e Tanielu se kopi o le maliega tusitusia i totonu o le lima aso. Faatoa maua e Tanielu le kopi o le maliega i le tolu vaiaso mulimuli ane, ae i lena taimi, ua fai lana faaiuga e nofo ai pea i le kamupani lea e sau ai lana eletise i le taimi lea. E lei mafai e le kamupani eletise ona saunia mo Tanielu se kopi o le maliega i le taimi faatulagaina, o lona uiga e lei usitaia mea e moomia mo le tulaga o faamatalaga e tuuina atu. O le a lē faaaogāina le maliega ma e mafai lava e Tanielu ona solofua le maliega i soo se taimi.


Pe apalai nei tulafono i maliega ua toe faafou?

Leai. Afai o se pisinisi o loo iai lava i le taimi nei se latou maliega ma se tagata faatau ma ua toe faafou e ala atu i se auala faatauanau (mo se faataitaiga, pe a vili se tagata o loo faatauina atu oloa [salesperson] i se tagata faatau [customer] e faatalanoa le toe faaumiumi atu o le la peleni o loo iai i le taimi nei), e lē faitaulia la lena mea o se faatauga tuusa’o faatauanau e tusa ai o le Tulafono o Fefaatauaiga Talafeagai. O nei maliega e ta’ua o maliega faafou (renewal agreement).

Faitau atili ia matou taiala e faatatau i le faatauina atu tuusa’o faatauanau.


Fautuaga mo pisinisi

Ina ia faamautinoa o loo mulimulita’ia e le aufaigaluega (sales staff) ma le aufaatau oloa (sales agents) nei taiala, e matou te fautuaina outou ina ia:

  • faatulaga se polokalame e matuā toleni lelei ai le aufaigaluega ma le aufaatau oloa ina ia malamalama ma faatino a latou matafaioi e tusa ai ma le tulafono
  • mata’itu le faatinoga o galuega a le aufaigaluega ina ia faamautinoa ai o loo latou usitaia le tulafono ma mataulia ai soo se faafitauli e alia’i mai
  • siaki lelei a outou maliega mo faatauga ina ia faamautinoa ua aofia uma ai faamatalaga talafeagai o loo tāpā mai e le tulafono.