Read this page in:

‘I ho‘o fakatau atu ‘a hono fakalōloa ‘o e extended warranty, kuopau ke ke:

  • ‘oange ki he kakai ‘oku nau fakatau e koloá ha tohi ‘oku fakaikiiki ai ‘a e ‘ū malu‘i ‘oku foaki ma‘a kinautolu ‘e he Consumer Guarantees Act (CGA) pea mo ha fakamatala ‘oku fakafehoanaki ai e ‘ū totonu ‘oku ‘oange ki ai ‘e he lao CGA pea mo ia te nau ma‘u mei he fakalōloá pe extended warranty.
  • fakamatala‘i ke mahino kapau ‘e fakatau ‘e ha taha ha fakalōloa, ‘e lava pē ke ne kaniseli kimu‘a pea ‘osi ha ‘aho ngāue ‘e 5 ‘o ka liliu ‘ene fakakaukaú, pea totongi fakafoki kotoa ange ‘a ‘ene siliní.

Ko hono ‘oange e ‘ū fakamatala ko ení ‘e tokoni ia ki he fili ‘a e tokotaha fakatau koloá ‘a e me‘a ‘e lelei ki aí, pē ‘e sai ke fakatau ha‘a ne fakalōloa malu‘i, pē te ne fiema‘u ia, pē ‘e ‘aonga ‘ene pa‘anga hono fakatau‘akí.

Kuopau ke ke ‘oange ha tatau ‘o e aleapau fakalōloa malu‘í ki he tokotaha fakataú he taimi ‘o e fakataú.

Ko e ngaahi pisinisi te nau maumau‘i ‘a e ‘ū tu‘utu‘uni fekau‘aki mo e fakalōloa malu‘i extended warranty, ‘e malava ke tohi mo‘ua kinautolu mo totongi ha $1,000 he taimi kotoa pē ‘oku nau maumau lao ai, pe ko e faka‘ilo mo mo‘ua ‘o a‘u ki he $30,000. ‘E malava ke tohi mo‘ua mo tautea ha ni‘ihi taautaha, ‘o faka‘ilo mo mo‘ua pa‘anga ‘o a‘u ki he $10,000.


Ko e hā ‘a e fakalōloa malu‘i pe extended warranty?

Ko e extended warranty ko ha fakalōloa ‘o e malu‘i pe uālenitī ‘oku ke toe totongi makehe ‘o hilifaki ia ‘i ‘olunga he mahu‘inga ‘o ha koloa ‘oku ke fakatau, hangē ko e komiputa, telefoni to‘oto‘o pe misini fō, pe ko ha fa‘ahinga ngāue kuo ke totongi ke fai ma‘au ‘o hangē ko ha ngaohi ha me‘a kuo maumau.  ‘Oku kehe pe ‘a e fakalōloa malu‘i extended warranty mei he malu‘i ta‘etotongi ‘oku ‘osi foaki atu ‘e he kautaha fo‘u koloá ki he ‘enau ‘ū koloá ‘a ia ‘oku ui ko e manufacturer’s warranty pe uālenitī ‘a e ngaohi‘anga pe fo‘u koloá. ‘Oku toe kehe pē foki ia mei he malu‘i ‘oku foaki atu ‘e he lao CGA, he ‘oku ne ‘osi malu‘i ‘e ia koe, tukukehe pē ‘i ha hoko ha ngaahi me‘a ‘e ala fakangatangata ai e malu‘i ko iá.


Ko hā e ‘ū me‘a ke fakakau mai ‘i he aleapau malu‘i extended warranty?

Kuopau ke ke ‘oange ha tatau ‘o e tohi aleapau malu‘i extended warranty ki he tokotaha ‘oku ne fakatau he taimi te ne fakatau aí. Ko e aleapaú ‘oku pau ke mahino ‘a hono fakaleá, faingofua hono laú mo maau foki.

Kuopau ke ‘asi ‘i he peesi ‘uluaki ‘o e aleapaú ‘a e:

  • to‘oto‘o konga lalahi ‘a e ‘ū totonu ‘a e tokotaha fakataú mo e ‘ū founga ke fakalelei‘aki ha ngaahi maumau pē faingata‘a‘ia ‘e hoko ‘o fakatatau ki he tu‘utu‘uni he lao CGA
  • fakafehoanaki ke mahino ‘a e ngaahi me‘a mahu‘inga ‘oku malu‘i ‘e he lao CGA pea mo e ngaahi lelei makahe ‘e ma‘u mei he fakalōloa ‘o e uāleniti.
  • to‘oto‘o konga lalahi e ‘ū totonu ‘a e tokotaha fakatau koloá ke kaniseli‘aki ‘a e aleapaú
  • hingoa ho‘o pisinisi, hala mo e tu‘asila, fika telefoni mo e ‘īmeili.

Ko e peesi ‘uluakí ‘oku hiki ai e ‘ū fakamatala mahu‘inga ni pea ‘oua ‘e toe hili hifo ha peesi kehe kimu‘a ai ke fakapuliki ‘aki. Hangē ko eni, ko e lau‘itohi aleapau malu‘i extended warranty, ke ‘oua na‘a takafi mu‘a‘aki ia ha peesi ‘oku ‘asi ai ha tu‘uaki pe ha peesi ‘uluaki ‘oku fakaikiiki ai e ngaahi tu‘utu‘uni pau ‘o hono fakalōloa ‘o e malu‘í.

‘Oua na‘a ke ngāue‘aki ha hingoa ‘o ha koloa, pe ha fakalea ‘o ha tu‘uaki, vikia pe malanga‘i fakamāketi ‘o lava ai ke ma‘uhala ‘e he kakai fakatau koloá ‘a e ‘ū lelei te nau ma‘u mei he fakaloloa ‘o e malu‘i extended warranty pe ke ne kouna‘i kinautolu ke nau fakatau ha fakalōloa.

Kuopau ke ‘asi ‘i he tohi aleapaú ‘a e ‘aho na‘e fakahoko ai, mo fakakau ki ai e kotoa ‘o e ‘ū tu‘utu‘uni paú mo e fakahinohinó – pea ‘oua na‘a hiki ia ‘i ha lau‘itohi makehe pe ha uepisaiti. ‘E kau ai heni ‘a e lōloa ‘o e malu‘í, kamata‘angá pea ‘e ngata ki ‘a fē pea mo e lahi fakakātoa e pa‘anga ‘e totongi ‘e he tokotaha fakatau koloá.

Kuopau ke ‘ilo ngofua ‘e he tokotaha fakatau koloá e lōloa mo e ‘aho ‘e ‘osi ki ai e taimi fakalōloa malu‘i.


‘E malava ‘e he tokotaha fakatau koloá ‘o kaniseli ‘a e extended warranty?

‘I ho‘o fakatau atu ‘a e fakalōloa malu‘i ni, ‘oku tukupau atu ki he tokotaha fakatau koloá ha ‘aho ngāue ‘e 5 (mei he ‘aho na‘a ke ‘oange ai ‘a e tatau ‘o e aleapaú) ke fa‘iteliha pē te ne kaniseli ‘a e malu‘i extended warranty pe kei hoko atu pē. Ka liliu ‘ene fakakaukaú ‘o kaniseli ‘a e aleapau malu‘í kimu‘a pea ‘osi e ‘aho ngāue ‘e 5, ‘oku ngofua pē ia, pea ke fakafoki kakato ange ki ai ‘a e pa‘anga na‘a ne totongí. Fakatokanga‘i: ‘oku ‘uhinga pe eni ki he fakalōloa malu‘i ‘o ‘ikai kau ai e koloa na‘a ke fakataú, pe ko e ngāue na‘a ke totongi ke fai.

Kuopau ke ke fakamatala ngutu eni ki he tokotaha ‘oku ne fakatau e koloá (tukukehe kapau na‘e fakatau he ‘initaneti ‘a e fakalōloa malu‘i) pea ke ‘asi foki ‘i he peesi ‘uluaki ‘o e aleapau malu‘i.


Ko e hā leva e ngaahi totonu mo e malu‘i ‘oku foaki atu ‘i he malumalu ‘o e lao CGA?

‘Oku ‘i ai e ‘ū malu‘i fakangatangata ‘oku foaki ‘e he laó ki he koloa kotoa pē ‘oku fakatau mei ha pisinisi ke ngāue‘aki ‘i ‘api (domestic use) pea pehē foki mo ha ngāue na‘e totongi ke fai. Ka tōnounou e malu‘i ko iá, ko e kautaha na‘a nau fakatau atu e koloá pe na‘a nau fakahoko e ngāué, te nau fai ‘a hono fakalelei‘i (remedy). ‘I he taimi ni‘ihi, ‘e fai ‘a e fakalelei ‘e he kautaha fa‘u koloá. Ko e fa‘ahinga fakalelei‘i ke faí, ‘e tefito ia he ngaahi tōnounou ne hokó.

‘Oku ‘ikai ngofua ke ke ‘oange ha fakamatala hala ki he tokotaha fakatau koloá, fekau‘aki mo ‘ene ‘ū totonu ‘oku ‘osi ‘oange ki ai ‘e he lao CGA, hangē ko ha‘o talaange ki ai ko ‘ene ‘ū totonu ‘oku foaki ‘e he lao CGA ‘oku fakangatangata pe ki ha ngaahi ta‘u. Ka hoko ha me‘a pehē, ‘e malava ke maumau‘i ai e lao fefakatau‘aki, Fair Trading Act.

Lau heni ‘a e tānaki atu ki he fakahinohino ‘o e lao CGA.

Uālenitī fakalōloa – LAU‘I TOHI FAKAHINOHINO – SUNE 2018 PDF (1 MB)