Mēnā kei te raruraru ā-pūtea koe, ā, ki ōu whakaaro ka uaua tō whakatutuki i ō utunga nama, e rua ngā huarahi ki a koe. Me wawe tonu tō kōrero atu ki tō kaituku moni taurewa kia kite ai mēnā ka taea e ia he huringa ki tō kirimana nama, mēnā rānei e āhei atu ana koe ki tētahi tono pōhara.
He mea nui kia wawe tonu te tiki āwhina. I tua atu i te whakamōhio atu ki tō kaituku moni kei te raruraru koe, he pai tonu pea te kōrero atu ki tētahi kaitohutohu pūtea mō ngā tohutohu whaitake.
E wātea ana te ataata me ngā kupu hauraro Māori.
Tīpakohia te ata Ngā Tautuhinga kei te kokonga matau o raro o te pūrere ataata > Pāwhiri Kupu Hauraro /CC > Tīpakohia te reo e hiahia ana koe.
Kōrero atu ki tō kaituku moni
Ko te tikanga, he rite tonu te hiahia o te kaituku moni ki te āwhina i ngā kaitono kei te raruraru, kia tere hoki ai rātau ki te ara tika me te utu haere anō i ā rātau nama ā tōna wā. Me pātai atu ki a ia mēnā ka huria e ia ō ture moni taurewa hei āwhina i te āhuatanga ki a koe. Hei tauira, mā te whakaroa ake i te roa o tō moni taurewa, te whakaiti rānei i ō utunga.
Ehara i te mea me whakarerekē e tō kaituku moni tō kirimana nama engari e herea ana ia kia tōkeke, kia matatika hoki te mahi ina pupū ake he raruraru.
Te tuku i tētahi tono pōhara
I raro i te ture kei a koe te motika ki te pātai atu ki tō kaituku moni mō tētahi huringa ki tō kirimana moni taurewa whaiaro, mōkete, kāri nama, tētahi atu kirimana nama kiritaki, mēnā e ū ana koe ki tētahi whakaritenga e whai ake:
i pā mai he uauatanga ki a koe kāore rawa i tūmanakohia e koe, pērā i tētahi māuiui, wharanga rānei, kua kore mahi, kua wehe kōrua ko tō hoa tētahi i tētahi, ka mate rānei tō hoa, makau rānei
nā taua uauatanga, kua kore e tino taea e koe ō utunga nama te whakaea
e whakapono ana koe ka taea e koe ō utunga nama te whakaea mēnā ka huria te kirimana ki ngā āhuatanga e tautuhia ana e te ture (tirohia 'He aha ngā huringa ka taea?').
Ka taea e koe ngā huringa ki tētahi kirimana te kōrerorero me tō kaituku moni, engari mēnā ka tukuna e koe he tono pōhara (mā te ū ki ngā whakaritenga i runga ake) me mātua whakaaroaro e tō kaituku moni me te whai i ngā tukanga tauwhāiti e hiahiatia ana e te ture.
Mō āhea āhei ai tētahi kaitono ki te tuku i tētahi tono pōhara?
He mea nui kia whakapā wawe atu koe ki tō kaituku moni mēnā kāore e taea e koe ō utunga nama te whakaea i te mea he whāiti te wā ki a koe ki te tuku i tētahi tono pōhara.
Ka taea e koe tētahi tono pōhara te tuku ahakoa te wā, engari anō mēnā:
kua rua marama, neke atu rānei koe e noho hapa ana
kua rua wiki, neke atu rānei koe e hapa ana i muri i te whiwhi i tētahi pānui whakatūpato murunga, tētahi pānui i raro i te Property Law Act rānei
kāore i utua e koe ō utunga nama whakaekeeke e whā, neke atu rānei i ngā rā i whakaritea.
Kotahi anake te tono pōhara ka taea e koe mō te kaupapa kotahi i roto i te whā marama te wā, engari anō mēnā ka whakaae te kaituku moni kia whakaaroarohia he tono atu anō. Ki te taea e koe ō utunga nama tōmuri te utu me ngā hapa hoki, ka taea anō e koe te tuku tono pōhara anō.
He aha ngā huringa ka taea?
Ka taea e koe te tono kia huria te kirimana mā te:
whakaroa ake i te roa o te kirimana me te whakaiti i te rahinga o ia utunga
hiki i ngā utunga nama mō tētahi wā tauwhāiti (he whakamatuatanga utunga)
whakaroa ake i te wā o te kirimana me te hiki i ngā utunga nama mō tētahi wā tauwhāiti (he whakamatuatanga utunga).
Ahakoa he tānga manawa ēnei huarahi mō te wā poto, kāore e kore ka nui ake te rahinga o te moni taurewa.
Kāore e taea e koe te tono huringa e tino nui ake i tērā e tika ana kia taea e koe ō herenga te whakatutuki i raro i te kirimana noho nama. Me mātua tika, me whaitake hoki ngā huringa e tonoa ana ki a kōrua tahi ko te kaituku moni ina whai whakaarohia ngā āhuatanga katoa.
