Read this page in:

E tāua le vave ona saili le fesoasoani. E lē gata i le faailoaina atu i lau kamupani nonō tupe le tulaga faigata o loo feagai ma oe, ae o se mea lelei foi lou talanoa atu i se budget adviser (tagata faufautua i paketi) mo se latou taitaiga aogā.

O loo maua le vitiō ua iai ma ona faamatalaga faa-Samoa (subtitles).

Filifili le faailoga (icon) o le Settings i le tulimanu taumatau i le pito i lalo o le masini vitiō > Oomi le upu Subtitles/CC > Filifili le gagana e te manao ai.

Talanoa i lau kamupani nonō tupe

E masani ona mananao kamupani nonō tupe e fesoaosani i tagata aitalafu tupe o loo feagai ma faigata, ina ia toe oo i se tulaga sologa lelei ma toe faaauau ai ona totogi a latou loans i le lumanai. Fesili iai pe o le a latou suia tuutuuga o lau loan ina ia fesoasoai atu ai i le tulaga o loo e iai. Mo se faata’ita’iga, o le toe faaopoopoina lea o le taimi e totogi ai lau loan poo le toe faalaiti o le totogi o au peimeni e fai.

E lē manaomia fua e le kamupani nonō tupe ona faia ni suiga i lau konekarate aitalafu, ae manaomia i latou e galulue talafeagai lelei ma alagatatau pe a tulai mai faafitauli.


Faiga o se talosaga mo tulaga faigata (hardship application)

E tusa ai ma le tulafono, e iai lau aiātatau e te talosagaina ai lau kamupani nonō tupe e faia se suiga i lau personal loan, mokesi, credit card poo isi konekarate faaaitalafu a e tagata faatau, pe afai lea e te ausia agavaa o loo mulimuli mai:

  • ua e mafatia i se tulaga faigata e te lei fuafuaina e oo iai, e pei o se ma’i poo se manu’aga, uma faafuasei lau galuega, ua uma se mafutaga, poo le maliu o se paaga poo le toalua
  • ona o lena tulaga faigata, ua lē mafai ai i se tulaga talafeagai ona e faia peimeni o lau aitalafu
  • e te talitonu o le a mafai ona e toe faia peimeni o lau aitalafu pe afai e suia le konekarate i auala ia ua faama’oti mai e le tulafono (tagai i le 'O ā suiga e mafai ona fai?').

E mafai ona e faatalatalanoa ni suiga o lau konekarate i soo se taimi lava ma lau kamupani nonō tupe, ae afai e fai sau talosaga mo tulaga faigata (i luga lena o lou ausia o agavaa ua ta’ua i luga) e tatau i le kamupani nonō tupe ona silasila iai ma mulimulita’ia le faagasologa patino ua tāpā mai e le tulafono.


O le ā le taimi e mafai ai e le tagata nonō tupe ona fai se talosaga mo tulaga faigata?

E tāua lou vave faafesootai lau kamupani nonō tupe pe afai ua lē mafai ona fai peimeni o lau aitalafu ona e faatapulaa mai le taimi e fai ai sau talosaga mo tulaga faitaga.

E mafai ona fai sau talosaga mo tulaga faigata i soo se taimi, se’i vaganā ai o oe:

  • ua lua masina pe sili atu talu ona lē totogia lau aitalafu
  • ua lua masina pe sili atu talu ona lē totogia lau aitalafu ina ua uma ona e maua se faaaliga e lapataia ai le aveesea o mea o loo faamau ai le loan (repossession warning notice) poo se faaaliga e tusa ai ma le Property Law Act
  • ua lē mafai ona faia peimeni se fā poo le sili atu foi faalausosoo i aso sa tatau ona faia ai.

E na’o le tasi le talosaga mo tulaga faigata e mafai ona e faia i ni mafuaaga tutusa i totonu o soo se vaitaimi e fā masina le umi, se’i vaganā ai ua malie le kamupani nonō tupe e toe iloilo se isi talosaga. Afai e te toe oo atu i le sologa lelei o le totogiina o peimeni o lau autalafu atoa ai ma peimeni na misi, ua e agavaa loa e toe faia se isi au talosaga mo tulaga faigata.


O ā suiga e mafai ona fai?

E mafai ona e talosaga e fai se suiga i lau konekarate e ala:

  • i le faaopoopo o le taimi o le konekarate ma faalaiti le tau o au peimeni taitasi
  • i le tolopoina o peimeni o le aitalafu mo se vaitaimi patino (faamaloloina o peimeni)
  • i le faaopoopoina o le umi o le konekarate ma le tolopoina o le faiga o peimeni o le aitalafu mo se vaitaimi patino (faamaloloina o peimeni).

E ui o nei filifiliga o le a maua ai sina mapusaga lē tumau, ae foliga mai o le a siitia ai le aofaiga e toe totogi o se loan.

E lē mafai ona e sailia ni suiga e tetelē atu nai lo le tulaga talafeagai e tatau ona iai, ina ia mafai ai ona e ausia au matafaioi e tusa ai ma le konekarate aitalafu. O suiga e talosagaina e tatau ona fetaui ma talafeagai mo oe ma lau kamupani nonō tupe pe a mae’a ona iloiloina uma tulaga o loo iai.

Faitau atili e faatatau i le talosaga mo tulaga faigata.