Ina whakarite ana i tētahi hokonga nui ka whakatakotohia pea ki a koe tētahi pūtāhui auroa. I mua i tō whiriwhiri mēnā ka hokona mai e koe, me mātua whakarite koe he aha nei ngā whakamarutanga tāpiri o taua pūtāhui, e ai ki ngā motika ka whiwhi noa koe i raro i te Consumer Guarantees Act.
Tīpakohia te ata Ngā Tautuhinga kei te kokonga matau o raro o te pūrere ataata > Pāwhiri Kupu Hauraro /CC > Tīpakohia te reo e hiahia ana koe.
Ina whakatakotohia he pūtāhui auroa ki a koe, ko tā te pakihi, kaihoko pea me mātua:
tuku ki a koe he tuhinga e mau ana i te whārangi o mua ngā whakamāramatanga o ngā whakamarutanga noa ka whiwhi i a koe i raro i te Consumer Guarantees Act (CGA) me whakataurite i ō whakamarutanga CGA ki ngā whakamarutanga ka tukuna e te pūtāhui auroa
whakamārama mēnā ka hokona mai e koe he pūtāhui auroa, ka taea e koe te huri ō whakaaro ka whakakore i te pūtāhui auroa i roto i ngā rā mahi e 5, ā, ka whiwhi i tētahi moni whakahoki o te utu katoa i utua mō te pūtāhui auroa.
Mā te whai i ēnei mōhiohio ka taea e koe te kōwhiri i runga i te mōhio mēnā he pai ake te whakamarutanga mōu i raro i tētahi pūtāhui auroa, kāore rānei, ā, mēnā e hiahiatia e koe, e pīrangi noa ana rānei i tētahi pūtāhui auroa, ka mutu, mēnā e whaikiko ana te utu ki a koe.
Me mātua whiwhi anō koe i tētahi tārua o te whakaaetanga pūtāhui auroa i te wā ka hokona mai e koe.
Mēnā ka takahia e tētahi pakihi ēnei ture, ka taea e koe te tuku amuamu mai.
He aha tēnei mea te pūtāhui auroa?
Ka hokona he pūtāhui auroa mō tētahi utu tāpiri i te wā ka hokona mai e koe ngā rawa, pērā i ngā rorohiko, waea pūkoro me ngā mīhini horoi kākahu, ngā ratonga rānei, pērā i ngā ratonga mahi ā-rehe. He rerekē te pūtāhui auroa ki te pūtāhui a tētahi kaimahitaonga, kei te taha tēnei o ngā rawa mō te koreutu. He rerekē anō tēnei mai i ngā whakaoati e tohua ana e te CGA, ka hāngai noa ēnei ahakoa te aha, ka mutu ka taea anake te karo i ngā āhuatanga tino whāiti.
He aha ngā mea i roto i tētahi whakaaetanga pūtāhui auroa?
Ko te tikanga me whiwhi koe i tētahi tārua ā-tuhi o te whakaaetanga pūtāhui auroa i te wā ka hokona mai e koe. Me mātua tuhi te whakaaetanga ki te reo māmā, me mārama ki te pānui me mārama hoki te takoto o ngā kōrero.
Me mātua mau ki te whārangi o mua ko:
tētahi whakarāpopotonga o ō motika me ngā rongoā i raro i te CGA
tētahi whakatauritenga i waenga i ngā pūtāhui CGA hāngai me ngā whakamarutanga ka tukuna e te pūtāhui auroa
tētahi whakarāpopotonga o ō motika ki te whakakore i te whakaaetanga
te ingoa o te pakihi, wāhi noho tiriti, tau waea, wāhitau īmēra hoki.
Me mātua tuhi i te rā ki te whakaaetanga me te whakauru i ngā ture me ngā here katoa – kaua rawa e tuhi ki tuhinga kē, whārangitukutuku kē rānei. Kei roto i ēnei ko ngā mea pēnei i te roa o te pūtāhui, āhea ka mutu me te utu tapeke ka utua e koe.
Ka aha mēnā ka hiahia ahau ki te whakakore i taku pūtāhui auroa?
Ina hokona mai e koe he pūtāhui auroa, e 5 rā mahi te roa ki a koe (mai i te wā ka whiwhi koe i tētahi tārua o te whakaaetanga) e whai wā ai koe ki te whakaaroaro mō te pūtāhui auroa i hokona mai e koe me te huri i ō whakaaro mēnā koinā tō hiahia. Ki te whakakorehia e koe i roto i te 5 rā mahi, ka āhei koe ki te whakakore i te whakaaetanga me te tono i tētahi moni whakahoki mō te katoa o te utu i utua e koe. Me mōhio: e hāngai anake tēnei ki te pūtāhui auroa, kaua ki ngā rawa, ratonga rānei.
Me mātua kōrero atu ā-waha te pakihi, kaihoko rānei ki a koe (engari rawa mēnā i hokona tuihonotia e koe te pūtāhui auroa), ka mutu, me mātua tuhi ki te whārangi o mua o te whakaaetanga pūtāhui auroa.
Mēnā e hiahia ana koe ki te whakakore i te whakaaetanga, whakapā atu ki te pakihi mā ngā taipitopito kua tukuna. Ka taea e koe tēnei mā te tuhi, kōrero rānei, ā, me mārama te kī atu kei te hiahia koe ki te whakakore i te whakaaetanga. Ka āhei koe ki te katoa o te moni whakahoki o te utu i utua e koe mō te pūtāhui auroa.
He aha aku whakamarutanga i raro i te CGA?
He whakaoati mōkito e hāngai ana ki ngā hua me ngā ratonga katoa ka hokona mai i tētahi kaiwhakarato mō ngā mahi noa a te tangata, i te kāinga, i rō whare rānei. Ki te kore e ū he whakaoati, me rongoā te raruraru e te kaiwhakarato o ngā rawa, ratonga rānei, ā, i ētahi āhuatanga mā te kaimahitaonga o ngā rawa. Kei te āhua o te kore ū ki te whakaoati te momo rongoā.
Kāore e taea e tētahi pakihi koe te whakakotiti mō ō whakamarutanga i raro i te CGA, hei tauira te kī atu ki a koe e whāiti ana ō motika CGA ki ētahi tau whāiti noa. Ki te pērā ka takahia pea te Fair Trading Act.
