Read this page in:

O loo maua le vitiō ua iai ma ona faamatalaga faa-Samoa (subtitles

Filifili le faailoga (icon) o le Settings i le tulimanu taumatau i le pito i lalo o le masini vitiō > Oomi le upu Subtitles/CC > Filifili le gagana e te manao ai.

Pe a ofo atu ia te oe se extended warranty, e tatau i le pisinisi poo le faatauoloa ona:

  • saunia atu mo oe se tusitusiga i le itulau pito i luma, o loo faamatala atu ai puipuiga e otomeki lava ona e maua i lalo o le Consumer Guarantees Act (CGA) ma faatusatusa ou puipuiga e maua i lalo o le CGA, i puipuiga o loo ofoina atu e le extended warranty
  • faamatala e faapea, afai e te faatauina se extended warranty, e mafai i totonu o le 5 aso faigaluega ona toe suia lou mafaufau ma toe soloia le extended warranty, ma toe faafoi uma atu lau tupe na totogi mo le extended warranty.

O le faailoaina o nei faamatalaga e mafai ai ona fai sau filifiliga atamai pe e puipuia lelei oe i le iai o se extended warranty nai lo le leai, pe e te manaomia moni le faia o se extended warranty, ae pe o se mea foi e alu aogā ai le tupe o le a tatau ona e totogia.

E tatau foi ona tuu atu ia te oe se kopi o le maliega mo le extended warranty i le taimi e te faatauina ai.

Afai ua solia e se pisinisi nei tulafono, e mafai ona e faia se faaseā ia matou.


O le ā le extended warranty?

E faatauina atu se extended warranty mo se tau faaopoopo i le taimi e te faatauina ai ni oloa, e pei o komepiuta, telefoni feaveai ma masini tāmea, poo auaunaga, e pei o auaunaga o matātā eseese (trade services). O le extended warranty e ese mai le warranty a le kamupani na gaosia le oloa (manufacturer), lea e aumai fua pe a faatau le oloa. E ese mai foi i guarantees ia e ono fautuaina mai e le CGA, lea e faaaogā lava se’i vaganā nisi o tulaga patino faatapulaa e mafai ai ona lē faaaogāina.


O ā mea e tatau ona aofia i le maliega mo se extended warranty?

E tatau ona avatu ia te oe se kopi tusitusia o le maliega mo le extended warranty i le taimi e te faatauina ai. E tatau ona manino le gagana e tusia ai le maliega, ia faigofie ona faitau ma malamalama lelei le faailoaina atu.

O le itulau pito i luma o le maliega e tatau ona iai:

  • se aotelega o au aiātatau ma vaifofo i lalo o le CGA
  • se faatusatusaga i le va o guarantees talafeagai a le CGA ma puipuiga e maua mai le extended warranty
  • se aotelega o lau aiātatau e toe soloia ai le maliega
  • le igoa o le pisinisi, le tuatusi o le auala, numera o le telefoni ma le tuatusi o le imeli.

E tatau i le maliega ona iai le aso ma aofia ai tuutuuga ma aiaiga uma – e lē mafai ona tuua i se isi tusitusiga e ese mai ai pe tuu i se itulau i le upega tafailagi. E aofia ai mea e pei o le umi o le a aogā ai le warranty, le aso e uma ai le aogā ma le tau atoa o le a e totogia.


E faapefea pe afai ua ou manao e toe soloia la’u extended warranty?

Pe a e faatauina se extended warranty, e 5 aso faigaluega (mai le taimi na e maua ai se kopi o le maliega) e tuu atu ia te oe e mafai ai ona toe suia lou mafaufau pe a e manao ai. E mafai ona e toe soloia le maliega i totonu o le 5 aso faigaluega, ma toe tāpā le faafoi mai o le tau atoa na e totogia. Mātau mai: e na’o le extended warranty o loo faatatau atu iai lenei tulaga, ae lē o oloa poo auaunaga.

E tatau ona tuu fofoga atu e le pisinisi poo se faatauoloa lenei mea (se’i vaganā pe afai na e faatauina mai i luga o le upega tafailagi le extended warranty) ma e tatau foi ona tusia i le itulau pito i luma o le maliega mo le extended warranty.

Afai ua e manao e toe soloia le maliega, faaaogā faamatalaga ua saunia atu e te faafesootaia ai le pisinisi. E mafai ona e tusi atu iai pe e te talanoa sa’o iai, ma e tatau ona e faamanino lelei atu iai o oe ua e manao e toe soloia le maliega. Ona e agavaa ai lea e toe maua uma mai lau tupe atoa na totogi mo le extended warranty.


O ā o’u puipuiga o loo iai i lalo o le CGA?

O loo iai faamaoniga (guarantees) faatapulaa e faatatau atu i oloa uma ma auaunaga na faatau mai se supplier e masani ona manaomia mo le faaaogāina e le tagata lava ia, totonu o aiga pe faaaogā e le auaiga. Afai e lē o ausia le faataunuuina o le guarantee na iai, e tatau i le supplier o oloa poo auaunaga, pe o le manufacturer foi o oloa i nisi o tulaga, ona fofo le faafitauli. E fuafua le ituaiga o vaifofo e fai, i le ituaiga o faaletonu lea ua lē taulau ai ona ausia le faataunuuina o le guarantee na iai.

E lē mafai e se pisinisi ona latou faaseseina oe e uiga i ou puipuiga i lalo o le CGA, mo se faataitaiga, o le ta’uina atu lea ia te oe e faapea, o au aiātatau i lalo o le CGA e faatapulaa le umi e aogā ai i totonu o le aofai patino o ni tausaga. O le faia faapea e ono solia ai le Tulafono o Fefaatauaiga Talafeagai (Fair Trading Act).

Faitau atili e uiga i le CGA.

Puipuiga faaopoopo – PEPA O FAAMATALAGA – IUNI 2018 PDF (3 MB)