Read this page in:

'Oku lava ke ma'u atu ha vitio 'oku 'asi ai 'a hono liliu e lea ki he lea faka-Tonga.

'Alu ki he faka'ilonga (icon) Settings 'i he tuliki to'omata'u 'i lalo 'i he video-player 'o fili/ lomi’i 'a e fo'i lea Subtitles/CC > pea ke fili mei ai 'a e lea faka-Tonga.

Ka tu‘uaki atu ha fakalōloa malu‘i pe extended warranty ‘e ha pisinisi pe tokotaha tu‘uaki kuo pau ke:

  • nau ‘oatu ha pepa ‘oku ‘asi he peesi ‘uluakí ‘a e fakahinohino ki he ‘ū totonu mo e malu‘i ‘oku ‘osi foaki atu ma‘au ‘e he lao Consumer Guarantees Act (CGA) pea ‘oku ne fakatatau‘i ia mo e ngaahi malu‘i ‘oku tānaki mai ‘e he extended warranty.
  • fakahinohino atu kapau te ke fakatau ha fakalōloa ‘o e malu‘i extended warranty, ‘e lava pē ke kaniseli ia ka liliu ho‘o fakakaukaú kimu‘a pea ‘osi ha ‘aho ngāue ‘e 5, pea tenau totongi fakafoki kotoa atu leva ho‘o silini na‘a ke fakatau‘aki.

Ko hono ‘oatu e ‘ū fakamatala ko ení ‘e tokoni ia ke ke fakakaukau‘i fakalelei pea ke toki fili pe ‘e sai nai ke ‘ai ha‘o extended warranty pe ‘ikai, pe ‘e fiema‘u pe tonu ke ‘ai ha‘o extended warranty, pe ‘oku ‘aonga e fakamole pa‘anga ko iá pē ‘ikai.

Kuo pau ke ‘oatu foki mo e tatau ‘o e aleapau malu‘i extended warranty he taimi te ke fakatau aí.

Ka maumau‘i ‘e ha pisinisi ‘a e ngaahi tu‘utu‘uni ko ení, ‘e lava ke ke lāunga mai ki a kimautolu.


Ko e hā ‘a e malu‘i extended warranty?

Ko e extended warranty ko ha malu‘i ‘oku fakatau pea ke toe totongi makehe ‘o hilifaki ia ‘i ‘olunga he mahu‘inga ‘o ha koloa ‘oku ke fakataú, hangē ko e komiputa, telefoni to‘oto‘o pe misini fō, pe ko ha fa‘ahinga ngāue kuo ke totongi ke fai ma‘au ‘o hangē ko ha ngaohi ha me‘a kuo maumau. ‘Oku kehe pe ‘a e fakalōloa malu‘i pe extended warranty mei he malu‘i ta‘etotongi ko ia ‘oku ‘osi foaki atu ‘e he kautaha fo‘u koloá ki he ‘enau ‘ū koloá ‘a ia ‘oku ui ko e manufacturer’s warranty. ‘Oku toe kehe pē foki ia mei he malu‘i ‘oku foaki atu ‘e he lao CGA, he ‘oku ne ‘osi malu‘i ‘e ia koe, tukukehe pē ‘i ha hoko ha ngaahi me‘a ‘e ala fakangatangata ai ‘a e malu‘i ko iá.


Ko hā e ‘ū me‘a ke fakakau mai ‘i he aleapau fakalōloa malu‘i pe extended warranty?

Kuopau ke ‘oatu kia koe ha tatau ‘o e aleapau he taimi te ke fakatau aí. Ko e aleapaú kuo pau ke mahino ‘a hono fakaleá, faingofua hono laú mo maau foki.

Kuopau ke ‘asi ‘i he peesi ‘uluaki ‘o e aleapaú ‘a e:

  • to‘oto‘o konga lalahi ‘a ho‘o ‘ū totonú mo e ‘ū founga ke fakalelei‘aki ha maumau pē faingata‘a‘ia ‘e hoko ‘o fakatatau ki he tu‘utu‘uni he lao CGA
  • fakafehoanaki ke mahino ‘a e ngaahi me‘a mahu‘inga ‘oku malu‘i ‘e he lao CGA pea mo e ngaahi lelei makahe ‘e ma‘u mei he extended warranty
  • to‘oto‘o konga lalahi ‘a ho‘o ‘ū totonu ke kaniseli‘aki ‘a e aleapaú
  • hingoa ‘o e pisinisí, hala mo e tu‘asila, fika telefoni mo e ‘īmeili.

Ko e aleapaú kuopau ke ‘asi ‘a e ‘aho na‘e fakahoko ai, mo fakakau ki ai e kotoa ‘o e ‘ū tu‘utu‘uni paú mo e fakahinohinó – pea ‘oua na‘a hiki ia ‘i ha lau‘itohi makehe pe ‘i ha uepisaiti. ‘E kau ai heni ‘a e lōloa ‘o e malu‘í, kamata‘angá pea ‘e ngata ki ‘a fē pea mo e lahi fakakātoa e pa‘anga ‘e totongi ‘e he tokotaha fakatau koloá.


‘E fēfē leva kau ka pehē ke kaniseli ‘eku malu‘i extended warrantly?

Kapau te ke fakatau ha fakalōloa malu‘i pe extended warranty, ‘oku ‘oatu e ‘aho ngāue ‘e 5 (mei he taimi na‘a ke ma‘u ai e tatau ‘o e aleapaú) na‘a liliu ho‘o fakakaukaú pea ke loto ke kaniseli. Ka liliu ho‘o fakakaukaú kimu‘a he ‘osi ha ‘aho ngāue ‘e 5, ‘e lava ke ke kaniseli ‘a e aleapaú pea ‘e fakafoki kakato atu e pa‘anga na‘a ke fakatau‘akí. Fakatokanga: ‘oku ‘uhinga pe eni ki he malu‘i extended warranty, ‘ikai kau ai e koloa na‘a ke fakataú pē ko e ngāue na‘a ke totongi ke fai.

Kuopau ke fakamatala ngutu atu eni kiate koe ‘e he pisinisi pe tokotaha tu‘uaki koloá (tukukehe kapau ko ha‘o fakatau he ‘initaneti ‘a e malu‘i extended warranty) pea ke ‘asi foki ‘i he peesi ‘uluaki ‘o e aleapau malu‘i.

Kapau te ke fiema‘u ke kaniseli ‘a e aleapaú, fetu‘utaki pe ki he pisinisí ‘o ngāue‘aki ‘a e fakahinohino mo e tu‘asila na‘a nau ‘oatú. ‘E malava ke ke faitohi ki a kinautolu pe temou talanoa fesiofaki, ‘o fakamahino ho‘o fiema‘u ke kaniseli ‘a e aleapaú. ‘Oku ‘i ai leva ho‘o totonu ke fakafoki kotoa atu ‘a e silini na‘a ke totongi‘aki ‘a e fakalōloa malu‘i.


Ko e hā ‘eku ngaahi totonu ‘i he malumalu ‘o e lao CGA?

‘Oku ‘i ai e ‘ū malu‘i fakangatangata ‘oku foaki ‘e he laó ki he koloa kotoa pē ‘oku fakatau mei ha pisinisi ke ngāue‘aki ‘i ‘api (domestic use) pea mo ha ngāue na‘e totongi ke fai. Ka tōnounou e malu‘i ko iá, ko e kautaha na‘a nau fakatau atu e koloá pe na‘a nau fakahoko e ngāué, te nau fai ‘a hono fakalelei‘i (remedy). ‘I he taimi ‘e ni‘ihi, ‘e fai ‘a e fakaleleí ‘e he kautaha fa‘u koloá. Ko e fakalelei‘i ke faí, ‘e tefito ia he natula ‘o e tōnounou ne hokó.

‘E ‘ikai ngofua ki ha pisinisi ke nau ‘oatu ha fakamatala ke takihala‘i ‘aki koe ‘o fekau‘aki mo ho‘o ‘ū totonu ‘oku ‘oatu ‘e he lao CGA, hangē ko ha‘a nau talaatu ko ho‘o ‘ū totonu ko iá ‘oku fakangatangata pe ki ha ngaahi ta‘u. Ka hoko ha me‘a pehē ‘e malava ke maumau‘i ai e lao fefakatau‘aki, Fair Trading Act.

Lau heni ‘a e tānaki atu ki he fakahinohino ‘o e lao CGA.

Uālenitī fakalōloa – LAU‘I TOHI FAKAHINOHINO – SUNE 2018 PDF (1 MB)