Read this page in:

Ko e lao Fair Trading Act ‘oku ‘i ai e ngaahi tu‘utu‘uni pau fekau‘aki mo e fa‘ahinga aleapau-fakatau-na‘e-fakahoko-neongo-na‘e-‘ikai-ke-fuofua-fakaafe‘i ‘a ia ‘oku kau ai e tu‘utu‘uni ki he ngaahi fakamatala kuo pau ke ‘oatu kiate koe ‘e he tokotaha tu‘uaki koloá, tu‘utu‘uni ‘oku ne faka‘atā ha taimi ke ke fakakaukau‘i ai telia na‘a liliu ho‘o fakakaukau. ‘Oku kau ai foki mo e pea ngaahi tu‘utu‘uni ‘i ha‘o loto ke kaniseli e aleapaú.

Lau ‘a e tānaki atu ki hono fakamatala‘i ‘o e lao Fair Trading Act.


‘I he peesi ko eni

Ko e hā ‘a e fakatau-na‘e-fakahoko-neongo-na‘e-‘ikai-ke-fuofua-fakaafe‘i (uninvited direct sale)?

Ko e me‘a ‘oku totonu ke ke ‘ilo

Ma‘u‘anga tokoni

Ko e fatongia ‘o e Potungāue Commerce Commission

'Oku lava ke ma'u atu ha vitio 'oku 'asi ai 'a hono liliu e lea ki he lea faka-Tonga.

'Alu ki he faka'ilonga (icon) Settings 'i he tuliki to'omata'u 'i lalo 'i he video-player 'o fili/ lomi’i 'a e fo'i lea Subtitles/CC > pea ke fili mei ai 'a e lea faka-Tonga.

Ko e hā ‘a e fakatau-na‘e-fakahoko-neongo-na‘e-‘ikai-ke-fuofua-fakaafe‘i?

‘Oku hoko eni ‘i ha:

  • fetu‘utaki hangatonu atu ai ha kautaha pe pisinisi, pe ko ha‘a nau fakafofonga, ki a koe ‘i ‘api, ngāue‘angá, pe na‘e telefoni atu pe ke tu‘uaki atu ha koloa pe ngāue, pea
  • na‘e ‘ikai ke ke fakaafe‘i nautolu ke nau ō atu ki ho ‘api nofo‘angá pe ke nau tā atu koe‘uhi ke ke fakatau ha koloa pe fai ha ngāue; pea
  • ko e aleapau fakatau koloá pe ngāué ‘oku $100 pe lahi hake ai (pe ko e mahu‘inga ‘o e koloá na‘e te‘eki fu‘u fakapapau‘i ‘i he taimi na‘e ‘oatu aí.).

pea kau ai mo e hoko:

  • ha‘o ‘oange ai ho hingoá mo ho tua‘silá pe fika telefoní ki ha pisinisi ‘i ha ‘uhinga ‘e taha (hangē ko ha‘o kau ki ha fe‘auhi) pea fetu‘utaki atu leva e kautahá pe pisinisí ia ki a koe ‘o tu‘uaki atu ha koloa pe ngāue; pe
  • ko ho‘o tali ha feinga fetu‘utaki atu ki a koe mei ha pisinisi ne nau toutou feinga atu (hangē ko ho‘o tā fakafoki ki ha fika telefoni ne feinga atu kia koe, pe ko ha‘o telefoni ki ha fika ‘oku ‘asi ‘i ha kaati ne nau tuku ho ‘api ke ke toki fetu‘utaki ange).

Ko e me‘a ‘oku totonu ke ke ‘ilo

  • ‘Oku ‘ikai fiema‘u ia ke ke fakatau ha koloa pe totongi‘i ha ngāue na‘e ‘ikai ke ke kole - ‘oku ‘i ai ho‘o totonu ke ke talaange ‘oku ‘ikai ke ke fiema‘u e koloá pe totongi‘i e ngāue ko iá.
  • Kapau ‘oku ‘ikai ke mahino lelei ki a koe e me‘a ‘oku feinga e tokotaha tu‘uaki koloá ke fakatau atú, pe te ke ongo‘i puputu‘u, ‘oua te ke tali pe fakamo‘oni ha me‘a, pe te ke ‘oange ho hingoá pe ha toe fakamatala fakaikiiki fekau‘aki mo koe.
  • Kimu‘a pe ke fakamo‘oni ha aleapau, kuo pau ke fakahā atu kiate koe ‘e he tokotaha tu‘uaki koloá ‘a ho‘o ngaahi totonú mo e anga hono kaniseli ‘o e aleapaú.
  • ‘Oku totonu ke ‘oatu ki a koe ‘e he tokotaha tu‘uaki koloá ha tatau ‘o e tohi aleapaú hili pe ‘a e fefakamo‘oni‘akí kapau na‘e fai e fakatau ‘i he ‘e ne a‘u atu ki ‘api na, pe ko e hili ha ‘aho ngāue ‘e 5 mei he taimi na‘e fai ai e felotoí ‘o kapau ne fai e fakatau ‘i he telefoní.
  • Ka iku ange ‘o ke fakatau ha koloa, ‘e lava pē ke liliu ho‘o fakakaukaú ‘o kaniseli ‘a e aleapaú ‘i ha fa‘ahinga ‘uhinga pē ‘i loto he ‘aho ngāue ‘e 5 mei he taimi na‘a ke ma‘u ai e tatau ‘o e tohi aleapaú.
  • Kapau ne te‘eki ke ke ma‘u ha tatau ‘o e tohi aleapaú ‘e lava pe ia ke ke kaniseli ‘e koe ‘i ha fa‘ahinga taimi pē.
  • Kapau ‘oku ‘ikai kakato e ngaahi fakamatala ‘oku fiema‘u ke ‘asi ‘i he aleapaú pē te‘eki ke fakahā atu kia koe ‘a ho‘o totonu ki hono kaniselí, ‘e ‘ikai ngofua ki he kautaha ha‘a nautolu e koloá ke nau fakahoko fakalao ‘a e tu‘utu‘uni ‘i he aleapaú.
  • Kapau leva te ke kaniseli ‘a e aleapaú, kuo pau ke fakafoki kotoa ‘e he kautaha na‘a nau fakatau atu ‘a e koloá, ‘a e pa‘anga na‘a ke ‘osi totongí.
  • Ka ke kaniseli ‘a e aleapaú ‘e fiema‘u ke ke tokanga‘i lelei ‘a e koloá ‘i ha ‘aho ngāue ‘e 10 mei he ‘aho ko ia na‘a ke kaniseli aí. Ko e maau pe ‘a hono totongi fakafoki kotoa atu ho‘o senití, kuo pau ke ke faka‘atā mo tukuange ha taimi faingamālie ma‘ae kautaha ne ‘a nautolu e koloá, ke nau uta fakafoki ‘i ha taimi te mou felotoi ki ai.
  • Ka ‘i ai ha ngāue ‘e fakahoko atu ma‘au ‘e he kautaha ha‘a nautolu e koloá ‘i loto he ‘aho ‘e 5 ‘oku lava ke kaniseli ai e aleapaú, ko e fo‘ui pe ia ‘o kinautolu he te ke kei lava pe ‘o kaniseli ‘a e aleapaú pea ‘ikai ke totongi ha pa‘anga.

Lau ‘a e tānaki atu ki he fakamatalá ni ‘i he ‘emau tohi fakahinohino fekau‘aki mo e fakatau-na‘e-fakahoko-neongo-na‘e-‘ikai-ke-fuofua-fakaafe‘i.


Ma‘u‘anga tokoni

Kapau ‘oku ke tui ne ‘ikai maa‘usia ‘e ha pisinisi honau ngaahi fatongia kia koé lolotonga ha aleapau fakatau-na‘e-fakahoko-neongo-na‘e-‘ikai-ke-fuofua-fakaafe‘i, ‘e lava ke ke fakahā mai kia kimautolu. Te ke lava pe foki ‘o fai ha‘o ‘eke‘i fakalao ‘i he malumalu ‘o e lao Fair Trading Act.

Fakahā mai ke mau ‘ilo‘i kapau ‘oku ke tui ‘oku ‘i ai ha pisinisi na‘e ‘ikai ke kakato ‘enau fakahoko fatongiá.


Ko e fatongia ‘o e Potungāue Commerce Commission

‘Oku mau fakahoko ‘a e tu‘utu‘uni ‘a e lao Fair Trading Act ‘a ia ‘oku ne ‘oange ki he kau fakatau koloá ‘a ‘ene ngaahi totonu fekau‘aki mo ha fakatau-na‘e-fakahoko-neongo-na‘e-‘ikai-ke-fuofua-fakaafe‘i. Te mau lava ‘o fakatotolo‘i ha pisinisi mo fakahoko e tu‘utu‘uni ‘a e laó kapau ‘oku pehē kuo hoko ha maumau‘i ‘o e Fair Trading Act.


Ko e fakatātā ‘o ha fakatau-na‘e-fakahoko-neongo-na‘e-‘ikai-ke-fuofua-fakaafe‘i

Ne tukituki atu ha tokotaha ‘i he ‘api nofo‘anga ‘o Ari ‘o tu‘uaki ange ki ai ha vekiume. Hili hono fakamatala‘i mo fakaangaanga hono ngāue‘aki e vekiumé ‘e he tokotaha tu‘uakí ne hoko atu leva ki he alea fakataú. Na‘e ‘oange ‘e he tokotaha tu‘uakí ki a Ari e tatau ‘o e aleapau fakataú ‘oku hā ai ko e vekiume ‘oku $49.00. Na‘e ‘ikai ke ‘asi ‘i he aleapaú ko e $49.00 ‘oku ‘ikai ko e mahu‘inga ia ‘o e vekiumé ka ko e totongi tipōsiti pē, pea ko e fakakātoa e pa‘anga ke totongí ko e $299.00. Ko e aleapau ko ení ‘oku ‘ikai muimui ki he tu‘utu‘uni ki hono fakahā e ngaahi fakahinohinó, koe‘uhi ko e ‘ikai ke ‘asi ai ‘a e mahu‘inga fakakātoa ‘o e koloá ‘o fakatatau mo e me‘a ne fai ki ai e felotoí. ‘I he ‘ene peheé ‘e ‘ikai lava ke fakahoko e tu‘utu‘uni ‘o e aleapau ni pea ‘e lava ‘e Ari ‘o kaniseli ‘a e aleapaú ‘i ha taimi pē.

Lau ‘a e tānaki atu ki he fakamatalá ni ‘i he ‘emau tohi fakahinohinó fekau‘aki mo hono tu‘uaki mo fakatau atu ha koloa ‘i he ngaahi ‘apí pea mo e fakamāketi ‘aki e telefoni atu (telemāketi).

‘E lava pe ke ke lau e ngaahi fakamatala ‘oku toe tānaki atu ‘i he ‘emau tohi fakahinohino Ko hono ngāue‘aki e kau fakafofonga (‘o e pisinisi pe kautaha) mo e kau telemāketi.

Tu‘uaki mo fakatau atu e koloa ‘i he ngaahi ‘apí pea mo e tu‘uaki fakatau ‘aki e telefoni atu (telemāketi) – TOHI FAKAHINOHINO – TISEMA 2018 PDF (688 KB)