O nei tau e ono aofia ai pasene tului ma tau e totogi mo nisi auaunaga e filifilia e pei o le inisiua. E ono aofia ai foi ni tau (fees).
O ā ituaiga tau e mafai ona tāpā mai e se kamupani nonō tupe?
E tele ituaiga tau eseese e ono tāpā e se kamupani nonō tupe mai le tagata o loo faia se nonogātupe. E aofia ai:
credit fees (tau o le aitalafu) e pei o tau mo le faatulagaina o le aitalafu poo tau a’o lei amataina ona fai peimeni
default fees (tau mo le lē faataunuuina) – tau e ao ona totogi e le tagata o loo faia se nonogātupe pe a ia solia aiaiga o lana konekarate
third party fees (tau a isi vaega) – tau e tāpā mai e se isi vaega e auai, e pei o se broker, e faatatau i se konekarate.
O ā tulafono e faaaogāina i tau?
I lalo o le tulafono, e tatau i kamupani nonō tupe ona faamautinoa:
le latou faailoa uma atu o tau e tatau ona totogi e le tagata o loo nonōina le tupe
le latou faamatalaina ma le manino o na tau
o loo talafeagai tau e totogi mo le faiga o le aitalafu ma tau mo le lē faataunuuina o le faiga o peimeni
latou te tuuina atu tau sa’o e totogi mo isi vaega auai.
E tatau ona faailoa atu tau
E tatau i le kamupani nonō tupe ona faatulaga atu i le latou uluai faamatalaga o mea e tatau ona faailoa mai, soo se tau e tatau ona totogi e le tagata o loo nonōina le tupe. E aofia ai le tau ma le mea e faasino iai, o afea e tatau ona totogi ai ae pe fia foi le tau lea o le a totogi. Afai e lē mafai e le kamupani nonō tupe ona faatulaga mai le aofai o le tau i lena taimi, e tatau la ona latou faailoa mai pe o le a faapefea ona latou fuafuaina le tau.
Afai o loo faataga e le konekarate se kamupani nonō tupe e toe sui tau ia o loo latou tāpā, pe toe faailoa mai nisi tau fou, e tatau lava la i le kamupani nonō tupe ona faailoa mai nei suiga i le tagata o loo nonōina le tupe, i totonu o le 5 aso faigaluega ona faato’ā tāpā ai lea o le tau fou.
E tatau ona manino lelei le faamatalaina o tau
E tatau ona faaeteete kamupani nonō tupe pe a latou faaigoaina ma faamatalaina atu tau. O lona uiga, ia faamanino lelei i tagata o loo nonōina tupe poo le ā le mea e totogi ai lea tau, o ituaiga o tupe totogi (costs) e toe faaola mai i le tau, o le ā le taimi o le a tāpā ai e le kamupani nonō tupe le tau, ma o ā mea e ono amata ai ona totogi le tau.
O le tulaga masani lava, o le igoa poo le faamatalaga o le tau e tatau ona maua ai e le tagata o loo nonōina le tupe lenei faamatalaga.
Afai e faamatalaina e kamupani nonō tupe a latou tau i se auala e taufaasese, latou te ono solia ai e lē gata i le Tulafono o Konekarate o Aitalafu ma le Tupe a le Tagata Faatau (Credit Contracts and Consumer Finance Act) ae faapea foi i le Tulafono o Fefaatauaiga Talafeagai (Fair Trading Act).
E tatau ona talafeagai tau mo le faiga o le aitalafu, ma tau pe a lē faataunuuina le faiga o peimeni
Soo se tau mo le faiga o le aitalafu poo se tau pe a lē faataunuuina le faiga o penimeni e tatau lava ona talafeagai. O le a iloiloina e le faamasinoga soo se tau poo tupe maumau a le kamupani nonō tupe, ma pe o atagia atu ai i tau se tulaga talafeagai o faiga faapisinisi.
Faitau atili i faamatalaga pe a e faia se konekarate faaaitalafu a le tagata faatau.
O tau a isi vaega (third party fee) e tatau ona faaaofia i le tau e totogi (cost)
Afai e tāpā e se isi vaega se tau e faatatau i se konekarate, e tatau la i le kamupani nonō tupe ona tuu atu ia te oe lea tau i le tau sa’o (cost) lea o le a e totogia. E tatau foi i kamupani nonō tupe ona tuu atu soo se pa’ū (discounts) poo ni alauni.
Afai e iloa e le kamupani nonō tupe e ono tāpā i latou e se isi vaega (third party) e totogi atu se tupe, ona tuu atu lea o lena tupe e totogi mai e le tagata o loo nonōina le tupe, ae o le tau moni e itiiti ifo nai lo le tau lea na fuafuaina, e tatau la i le kamupani nonō tupe ona toe faafoi i le tagata o loo nonōina le tupe le eseesega poo le tupe lea ua sili.
O le komisi (commission) talafeagai lea e totogi atu i se kamupani nonō tupe mo le inisua o le aitalafu, e lē o se tau a isi vaega.